كلام حب ورومانسية

كلام حب و رومانسية

للحب معاني و ابيات كثيرة من الشعر و الغزل اليكم بعض الكلمات الرومانسية و الحب المطلق مع بعض كلمات العتاب و الحزن و فراق الحبيب ابيات شعر و معاني كثيرة من الحب و الاشتياق و الفراق اليكم بعض ابيات الشعر الجميل من فراق الاحبة و لقاء و فراق دائم لا ينتهي فقليلا ان تواجد الحب بين ضلوع المحبين و العشاق

وما دام العشرة خلاص هانت  –   والنيّه كمان طلعت تمثيل ..
وما دام الليله خلاص بانت  –   الليل رح يرجع تاني طويل ..
وهفارق واعمل مش فارق  –  الحمل ان كان ع ضهري تقيل ..
فانا قلبي حديد عمرة ما يبكي – وهكمّل وحدي ووحدي هشيل ..
هتعوّد لما احتاج للبيت – أحضن دراعاتي واطبطبني ..
وان مرّه يتيمه ف يوم حنّيت – هحضن ف احلام كات تتعبني ..
وان غصبن عنّي ضعفت وجيت – من حقك طبعا تضربني ..
وتهين جوايا كيان بيموت –  م الليله خلاص مش هبكي بصوت ..
ولا هتعب من قلقي عليكي – والبيت دا هحرم جمبه أفوت ..
والرقم اللي معايا مسحته – والحلم اللي ف قلبي دبحته ..
وان رمشك مرّ ف يوم ع البال – هحلف علي قلبك ما لمحته ..
انا كنت زمان واقف ع النور – دلوقتي بخاف لو اكون تحته ..

القلب شايل م الهموم مليون وجع ميكفيهوش مليون فضا ..
ارجوك يارب ..أوعاك تكون غضبان عليا عشان هويت الفضفضه ..
كل البشر مقالوش زياده عن اللي قولته زمان ف وحيك م السما ..
مهما القليب هيخاف اووي …فمفيش مفرّ من القضا …
وانا عمري مرّه ما هعترض او حتي هسأل ليه كده ؟!…انا راضي جدا أنما …
انا ليا فيك شيء م العشم …
القلب بأيدك وانت وحدك تملكه ..ما انت اللي خالقه من تراب ومن العدم ..
اكفينا شر الفُرقه وقت الاشتياق ..والاحتياج والوحده والخوف والندم ..
(أسماء )يارب … لو فيها خير او فيا خير أو لينا خير مع بعضنا ..
أكتبلنا ..واربط ما بيننا بخيط قوي ما يفكهوش ولا عزرائيل ..
أما ان كتبت عليّا أفارق لاجل حكمه ف رحمتك ..فأنا راضي بيك وبقسمتك ..
بس انت عارف ان ليلي طويل أووي ..والوحده شيء بارد ثقيل ..
ارجوك يارب لو كنت كاتب شيء ف بكرة عن الفراق ..اسمع دعايا وغيّره ..
يا تضمّ قلبي لنور رضاك ..تهديه أليك وتصبّرة ..
وان مرة بكيت.. حاسب لهتنزف تاني دموع …
وان مرة شكيت ..متقولش لحد أنك موجوع ..
وان مرة حكيت ..فبلاش تتكلم ف الماضي ..
الماضي بيوجع ع الفاضي ..
واللي انتا فارقته ملوهش رجوع ..
هتسافر قد ماهتسافر وتروح وتغيب .. وهترجع برضوا وف الاخر وملكش حبيب ..
تضحك علي نفسك وتكابر وتقول دا نصيب .. هتعاند قلبك وتعافر …ياتصيب يا تخيب ..
وتملّي تخيب ..وهتنزل دمعه بقالها زمان ..
هتطفّي ف قلبك نار شوقه وكتر التعذيب ..
ف نهايه الرحله هنتحاسب ..
وجراحك هتسابقك دايما وف كل مكان ..
هتلاقي الشوق دايما مكتوب ..ف الصفحه وف ألاخر ماضيه …
صفحه أفراحك ليه فاضيه ؟!
_طب فين سمسمتك روح روحك..
فارقتني وبالضربه القاضيه ..
طب مين رح يسمع صوت بوحك ؟!
نفسك ..صعبانه عليك نفسك ؟!
انا نفسي تملّي تكون راضيه ..
_أنساها يا شيخ وبلاش تضعف ..
ع فكرة انا عمري ما كنت ضعيف ..
انا أصلا دايما كنت أحلم ..بس الاحلام تتحول زيف ….
والحلم الاحلي بيبقي كابوس ..
انا واحد كل ما فيه محبوس ..
ومزاج الناس علي جرحي تدوس ..
مبقتش خلاص بندم علي شيء
ولا فارقه انا همشي ف اي طريق ..
انا قبله مفارق الف حبيب ..مش اول مره هحب واسيب ..
مش أول مرّه هقول جارحين ..
ولا أول مرّه هعيش مكبوت ..
انا عمري ما يوم انا كنت حزين ..
بس انا ف المجمل مش مبسوط ..
_طيب اسمعني ..هتروح علي فين ..
من فضلك سيبني ..
انا رايح اموت ..

الا أيها المقتول غدرا منذ فارقت الوطن ..
طال ليلٌ ..ضقت زرعا ..باقي فيك حبّه شجن …
صار ليل الهجر دهرا …جفّ نبع الدمع قهرا ..
أصل طول الشوق يا خلّي ..سوس بينخر ف البدن ..
بالمُختصر يا (سمسمه )..طال الوجع ..والليل طويل ..
كل القلوب مستسلمه ..وانا مش جدع ..لكن تقيل ..
الساعه ملّت بصّتي ..ومرايتي كرهت طلّتي ..
حتي الشفايف بلّمت ..مبقتش تعشق ضحكتي ..
انا مش حزين ..ولا جاي اعاتبك ع اللي شايله من سنين ..
وبرغم كل اللي اتعمل لجل العيون المفضوحين …
ما تخبّي عنك شوق ملوش حدّ ومدّي ..رغم السكوت رغم الكلام ..
سجن القليب كان سورة اضعف م الصدي …
العين بتلمع وقت ما تقوللي السلام ..
ومفيش مفرّ من القضا ..
شوق الغريب لارض الحبايب معجزة ..
ما يساعوا 100 مليون فضا ..

نادي منادي للحياه أن يا قلوب العاشقين توبوا …
العشق داء ضارب جذور ف قلب قلب اللا فرح ..
كل اللي كان عاشق جرح ..
العشق حاله سكر طالت ف المدي ..
ومفيش حدا …كان قاللكم قبل الاوان دوبوا ..
وانا هعمل ايه يام العيون كوكب غريب ..
انا مش بأيدي أني أكون صورة لحبيب …
ومكانش بايدي لما صرت أسير ما بين رمش العيون ..
ودا مين أذنلك تسحري قلبي الغريب ؟!
رغم اللي صاير م الوجع مقدرش أخون …
فاكرة السنين هتطفي نار شوق السنين..
ولا الحنين هيزيد شويه ورح يغادر بالحنين ..
هو الحزين لو مهما طال جمبه الفرح …مش برضوا رح يفضل حزين ؟!
وانا مش حزين ..انا بس صاب قلبي الشجن ..
كل العوامل قررّت من طول بعاد صابه العفن ..
وعشان كده ..دايما بدمّع بس دمعي يكون خفيف ..
انا مش ضعيف ..
وان كان نصيب قلبي الفرح …يبقي الفرح ..
وان كان نصيب قلبي الفراق ..
فانا مش ملاك ..كل اللي قبلي من البشر فارق وداق ..
وان كان علي دموع الوجع ..
فأنا واد جدع ..ولا عمري قلبي ف يوم هيهرب م القضا مهما اتجرح..

وبتقوللي ..
منيش عاوزة اهتمام منّك ..
ولا رايداك تكون حدّي ..
ومين اصلا سمح أنّك ..
تخوض علشاني كام ممكن ..
وتكتب فيا أشعارك ..
وتوصف بالحنين شوقك ؟!
وتربط بيا مشوارك ..
وتتحمّل حمول فوقك ..
وتوصل ليا بتحدّي ؟!
يا روح الروح ..
بلاش تقسي علي المجروح ..
بلاش قلبك يكون سجّان ..
ويسجن فيا أحساسي ..
ياكل ما ليّا من ناسي ..
ياريت قلبك يعوز يسمع ..
وايه يمنع ؟!
لو اعشق فيكي كام مليون من السنوات ؟؟!
محدش مرّه حب ومات ..
اكيد عشقك دا من حقّي..
وانّي اكتبلك الكلمه اللي مش قادر أقولهالك ..
دا من حقي ..
وأني اني اوهبلك القصه اللي مش عارف اعيشهالك ..
دا من حقي ..
وأني اسمح لنور ضيّك يعشش فيا من شقّي ..
دا من حقي ..
مادام من حقي أني اعشق ..فكل الدنيا من حقي ..

ومن أمتي ..
رسول العشق بيفاوض علي المعشوق ؟!
ومن أمتي ؟!
غريق العشق بيلاقي ف قلبك طوق ؟!
ومن أمتي ..
تلوج الغربه بتحاول تطفّي الشوق ؟!
ومن أمتي …
يا نجمه ف السما ضيّك بيسحر فيا من بدري …
أتاني العشق من رمشك وانا والله ما أقصد ..
أتاني العشق من حيث ..ما كنت أعلم ولا أدري ..
جمال روحك معدّي حدود ..وصار أبعد من المفروض ..
وانا الدرويش ..
ولو يندهني صوت طيفك ..فغصب عنّي أنّي مجيش ..
ضيا نور العيون فيكي ..دا شيء أكبر من القدرة اللي جوايا ..
وانا خايف لا يوم يضيق عليه صدري ..
ومين قاللك ؟!
انا ما شبعت من خمرك …ياريت لو تسمحي لقلبي بأنه يدوق ..
ومين قاللك ؟! بأن السكر من طيفك حرام او عيب ..
ومين يعلم ..أكيد بكرة محوّش لينا كام فرحه ف علم الغيب ..
ومين قاللك ؟! بأن القلب كان نفسه ف مرّه يفوق ؟!
انا العاجز ف طول البعد أنّي اصبر ..حدود شوقي بتتعدّي بكام مليون حدود صبري ..

يارب ياللي بقدرتك تحيي اللي مات من بعد توهه وعدم ..
يارب ياللي برحمتك بتقول تعالوا اطلبوا وانا برضوا هديكم ..
يارب يا غافر كل الذنوب بالندم …
وبتستمع للمذنبين ..وقت ألانين ف الليل ..
وبتستمع للمجروحين وقت الدموع ما تسيل ..
وبتشفي كل الموجوعين من كل خنقه وألم …
وبرغم كون البشر مش كلهم طايعين ..
بتمدّ أيدك بالكرم علي خلقك المساكين ..
ان يا عبادي أستغفروا ..وأنا برضوا ههديكم ..

وهييجي يوم …تلقي الحواجز سلّمت ..
وأتكسرت كل الصخور ويا البيبان ..
وهييجي يوم ويؤون اوان قلبي الجبان ..
هيشق قلبك كام شعاع من شوقي ليك ..
من غصب عنّي هعترف ..
وهييجي يوم والشوق يسيب قلبك يبان ..
فات الكتير …
مفاضلش غير …
كام ألف دمعه هتحرقك ..هتهدّ فيك ..
هيجف نبع الروح ف قلبك من عنيك ..
هيجف شوقك قبل ما يؤون الآوان ..
وف يومها بس ..
هتشوف حبيب ياما أفترق عنّك وتاه …
وبكف أيده هترتوي ترياق حياه ..
ترياق أمان ..
عطشان قليبك للفرح ..علشان كده ..
مهما الحبيب رح يروي فيك ..هتقول كمان ..

انا اللي اختارت يا قلبي بلاش تندم علي الذكري ..
ما يمكن كان قدر مكتوب وفرّحنا يومين وخلاص ..
ومين عارف يا سمسمتي هيحصل أيه ف ليل بكرة ..
ما يمكن تاني يجمعنا ..علي العشرة اللي جمعتنا ..
ويمكن مرّه نصحي ف يوم نلاقي الملتقي بيتنا ..
ومين عارف ؟!مع الايام هنوصل فين ؟!
دا عمر الدنيا متفرّق ما بين قلبين ..
يادوب الرحله جمعتهم علي طريقين ..
وياريت .ياريت ..كل اللي شاف يوم ضحكتك يصبح عدم ..
مين اللي يقدر يوم يشوف ضحكه ملاك ومتسحروش؟؟!
خايف ل ييجي ف يوم أمير من عصر روما ويخطفك ..
وساعتها يمكن أنّي أموت من شوقي ليكي مع الندم ..
فياريت ياريت ..لو مرّه بابك يتفتح قدام قليبي تسنديه ..مترديهوش ..
الهروب م الجرح واجب ..
والهروب م العشق فرض ..
قلبك اللي مكانش عاجب ..
باع سماه والجنّه فيها ..
باع سنينه وباع ماضيها ..
واشتري مترين ف أرض ..