طرق ووصفات لتسهيل الولاده
بسم الله الرحمن الرحيم
السلام عليكم ورحمة الله وبركاته
ازيكوا يا ماميز يا حلوين؟ عاملين ايه؟
طبعا انا عارفه ان في ماماهات كتير حوامل , ربنا معاهم يا رب ويقومهم بالسلامه
واكيد اكيد بال كل واحده مشغول جدا من اول لحظة ما عرفت انها حامل اللي هي اللحظه دي
ساعة ما شوفتي الخطين ملونين والدنيا مش سايعاكي من الفرحه واكيد فضلتي تفكري كتير يا ترى ولد؟ يا ترى بنت؟
والاهم من ده كله واللي شغل بالك اكتر واكتر هي اصعب لحظه ممكن تمر عليكي بعد 9 شهور
وهي لحظة الولاده , بس تعالي اقولك ع سر
هاتي ودنك كده
هقولك ع سر يخليكي متخافيش ابدا من الولاده بل بالعكس تستني اللحظه دي بفارغ الصبر وكل اللي هتفكري فيه هو انك اخيرا هتشوفي ابنك او بنتك
اول حاجه كده
الرياضه ثم الرياضه ثم الرياضه , طبعا مستغربه وبتقولي رياضه؟ رياضة ايه دي اللي اعملها ده انا اول ما عرفت اني حامل بقيت بصلي وانا قاعده , اسمعي مني بس …….. الرياضه اثناء الحمل فوايدها كتير جدا
اولا:بتقوي عضلات الرحم جدا
ثانيا:بتوسع الرحم عشان تسهل نزول الجنين
ثالثا: وده الاهم بالنسبه لكتير مننا ان الرياضه هي اللي هتساعد ف ان بطنك ترجع لاقرب وضع عليه قبل الحمل
طب اديني قولتلك فوايد الرياضه , اسيبك كده؟
وتعملي اي رياضه وخلاص ؟ لا طبعا الرياضه بتبدأي تعمليها بعد الشهر التالت من الحمل وطبعا بعد ما تسألي الدكتور بتاعك
ثانيا مش اي تمارين تعمليها انا جبتلك كام صوره لتمارين هيساعدوكي جدا
اول تمرين بتنامي ع ضهرك وتبدأي ترفعي جسمك من تحت زي الصوره كده
دي تمارين استمري عليها هتفيدك جدا زي ما قولتلك
طب افرضي لا قدر الله حالتك متسمحش بانك تلعبي رياضه؟
تعملي ايه ؟
هقولك…….
عندك يا ستي كام نوع اعشاب كده تشربيهم دول هيساعدوا اوي ف الولاده ان شاء الله بس دول ما يتشربوش الا “لما علامات الولاده تظهر”
ايه بقى هما؟
1:اليانسون…. هيقوي الطلق ويهدي اعصابك
2:أوراق المرامية….ودي عشان تقوي الرحم وتخفف من وجع الولاده ,طب دي اعملها ازاي؟ بصي يا ستي ,معلقه كبيره من المراميه ف كوباية ميه واغليها ع النار واشربيها بس دي اول ما تحسي بطلق
3: العسل والحلبة….لو شربتي اول ما الطلق يبدأ كوباية حلبه بالعسل ان شاء الله هتولدي بسهوله ; لان الحلبه بتضيع الام وكمان ليها مفعوا منشط للرحم عشان كده المفروض تعتمدي عليها ف اخر فتره من الحمل كل يوم كوباية حلبه مغليه وحليها بالعسل مره الصبح ومره بالليل
4:الدارسين اللي هو القرفة يعني….ودي مش تتشرب الا اذا كان في تعسر ف الولاده قبل كده لا
5:ودي خلطه باللبن عباره عن ايه؟ كوباية لبن+15عود قرفه+15عودقرنفل+معلقتين عسل+نص فنجان زيت سمسم ……..هتحطيهم ع بعض وتغليهم ع النار كام دقيقه كده وبعدين تشربيها “بس دي مش قبل التاسع لازم تبدأي ف التاسع ويعدي فيه 10 ايام وكل اربع ايام كوبايه”
6:منقوع الزعتر….يساعد على فتح الرحم .
7:مغلي البابونج….يحمي الطلق ويفتح الرحم .
8: كف مريم….اخلطيه مع حبه قرفة و قرنفل وكمون حب وبعدين اغليه على النار .
9: زيت الخروع….(موجود في الصيدليات) وفي كبسولات زيت الخروع
10:اللبن الدافي مع الزعفران
11: البقدونس المغلي
12:شاي أوراق التوت البري لأن فيه مادة تسبب تنشيط عضلات الرحم وتقوية أثناء الولادة الطبيعية.
13:مغلي البابونج لانه يساعد على فتح عنق الرحم ويقوي من الطلق عشان كده يُنصح بشرب كوبايه واحده من منقوع البابونج يومياً لتسهيل الولادة بشكل جيد
14:زيت زهرة الربيع المسائية اللي بترقق عنق الرحم وبتساعد على تمدده وتجهيزه للولادة
طب ادي المشروبات ….
ايه الاكل اللي تاكليه ويساعدك؟
عندك يا ستي
1:التمر ….. تاكلي التمر من بداية التاسع كلي كل يوم هيساعد جدا ان شاء الله
2:الاناناس والبابايا والمانجو:الفواكه دي بتحرض الجسم انه يفرز انزيمات شغلانتها انها ترقق عنق الرحم وتقلل فترة المخاض وبكده بتسرع الولاده
ايه كمان؟
العلاقه الحميمه: لازم ف الشهر الاخير الاكثار من الجماع عشان بيساعد ع توسيع عنق المهبل وتسرع من الطلق،وكمان تحتوي الحيوانات المنوية للرجل على البروستاجلاندين ودي هرمونات بتساعد على ترقيق وتمديد عنق الرحم لينضج ويجهز لعملية الولادة، كمان هزة الجماع او الاورجانيزم للست بيحرر هرمون الأوكسيتوسين، اللي بيساعد ف حدوث انقباضات والمداعبات الحميمية نفسها تزيد من إفرازات الهرمونات المنشطة للرحم والمسرعة للطلق
المشي: المشي من اهم العوامل اللي بتساعد ف تسهيل الولاده خاصة ف الشهر الاخير لانه بيساعد ف تثبيت الجنين ف الحوض وبيساعد ع توسيع فتحة المهبل
كمان في حاجة اسمها كرة الولاده: كرة الولادة دي ليها فوايد كتيرة خاصة مع نهاية الحمل، عشان كده يُنصح باستخدامها والجلوس والحركة عليها لان ده هيساعد في تحريك الحوض وفي وضع الطفل ونزول رأسه في أسفل الحوض تمهيداً للولادة. وكمان الدوران على الكرة هيساعد في تليين عضلات الحوض ويخفف من آلام أسفل الظهر
من اهم الحاجات كمان اللي بتساعد ع سهولة الولاده هي الاسترخاء والهدوء التام انسي اي لحظه خوف ممكن تحسيها متفكريش غير ف انك خلاص هتشوفي ابنك او بنتك كلميه جهزي هدومه وحطيها ع بطنك كأنك بتقسيها عليه اسمعي موسيقى هاديه كده يعني كل ده صدقيني هيهديكي وهيفيدك جدا لان لما تكون أعصابك متوترة، بيرتفع مستوى الأدرنالين في الجسم، وده ممكن يمنع حدوث الطلق. متستغربيش لان مع زيادة معدلات الأدرنالين في الدم، بيتكون مضاد لهرمون الأوكسيتوتسين اللي هو الهرمون المسؤول عن بدء الطلق والولاده
كمان في تدليك الحلمتين وده يعتبر من أكتر الحاجات اللي تسرع من إفراز الأوكسيتوتسين. واظبي على التدليك ده ما بين 20 إلى 40 دقيقة يوميًا
كمان تقدري تاخدي منشطات رحمية تساعد على تيسيير الولادة والإسراع منها ودي بتبقى طبيعيه وآمنه تماما
اسأل الله العظيم ان يسهل ع كل حامل وان يرزق كل من يريد بالذرية الصالحه يا رب العالمين
يا رب اكون قدرت افيدكم 🙂