قصائد واشعار حب رومانسية

قصائد واشعار حب رومانسية

حكمت عليهم محكمه (أهل الهوي )..بالنفي فورا خارج القلب اللي داب ..
ومهمش القاضي الحزين أيام زمان ..أيام ماكان ..كل اللي يوجع قلبهم.. شيء منهم ..
نفس السبب دايما بيوجعهم سوا ..متجمعين وقت الفُراق ماسكين أوي ..
متفرقين وقت اللقا من غير عتاب ..وعشان كده حكمت جناب المحكمه بسنين عذاب ..
ياكل مُجرم كان سلاح قلبك بكا ..مكتوب عليك ..ترفع أيديك للتهلُكه ..
طبع الوجع مبيتنسيش غير بالحساب …يا كل قاتل بالفُراق ملعون خُطاك ..
ملعون كمان دم الشيطان اللي ف خطاك ..ملعونه ذره أكسجين كانت سبب ..
ملعون قليب العاشقين لما اتخدع ..ياللعجب ..نفس القليب اللي انقتل ..
كان مُقتنع بالوهم مؤمن بيك ..جدع ..عُمر الخراب ما هيرحمك منّه الوجع ..
لو مهما قلبّك أدبك ..او مهما تاب ..
والحقيقه المُرّه دايما ..إن اكتر حد قرّب..خد حنينّا وداق سنيننا ..ولحنان القلب جرّب …
برضوا ف الآخر وجعنا ..سكّه ليه للجرح سالكه ؟!
مش ضروري نكون ملايكه ..يمكن انت خدعت غيرك ..أو آمنت زياده يمكن …سيبت قلبك لمّا سلّم ..
وأما عشق الفُرقه يسكن ..يبقي كتّر ألف خيرك ..وانت ليه راجع بتسأل ؟! ..
كل شيء مكتوب علينا ..وأحنا برضوا اللي ابتدينا ..لو خدعنا الحبّ مره ..فاحنا ياما كتير خدعنا ..

مش هتفرق ..
الحياه مش هيا برضوا ..
اللي كان ع الارض ماشي ..أصبح المدفون ف أرضه..أصل شكل الموت مُربع ..يعني طوله زي عرضه ..
والوصيّه ..هيّ هيّ ..سيبنا نرحل منها يمكن.. نلقي حضن الموت يساعنا
خبّي شوقك م النهارده ..
الدموع ف عيونها بارده …والحنين اللي انت سارقه ..
انتي آخر شيء هفارقه …
لو ذنوب الكون هتُغفر ..فأنتي مُصحف كنت حارقه ..
أنتي لعنه …

ياللي جارح .. ياللي سارح .. ياللي متغرّب بقالك ..
كام وجع .. انت ليه منتاش جدع ..لو ظلمتك يوم سامحني ..
لو ظالمني برضوا سامح ..الغلط واحد يا صاحبي ..اننا دايما بنعشق ..
حدّ اصلا مش بتاعنا ..

انا منكم …
بحق الدمّ في عروقي ,.. أنا منكم .. بحق الباقي من شوقي ..أنا منكم ..
بحق الجرح من تحتي ..وحق الفُرقه من فوقي .. أنا منكم …وكل كلامي كان عنكم ..
وكل دموعي كات منكم ..نزيف الروح..بيقفل كل باب بيني وبين بينكم ..
أنا المجروح ..وأنا المدبوح ..وانا المُجرم قصاد روحي ..وانا المظلوم قصاد عينكم …
انا اللي جرحت ف جروحي ..لحد القلب ما استكفي ..انا اللي كتمت صوت بوحي ..وصرت كفيف ..
معايا من العذاب حرّاس لكنّي ضعيف ..ورغم ان النظر شايف … عشان الننّي كان خايف ..
بقيت ماشي وبتكفّي ..كفايا جروح ..كفايا فُراق ..كفايا تعبت م الاشواق ..
من الليله خلاص هبكي وانا بضحك..وهرسم ع الخراب شجرة وهرويها …وهرسم ع الصخور مطرة وههريها ..
من الليله ..هحط الدنيا دي ف كفّه ..وانا ف كفّه ..من الليله ..أنا لُقمه ..لا تنفع تتهضم فيكم ..ولا تقطّعها أسنانكم ..
انا م الليله مش منكم …

ومين قاللك ؟!
بإني حقيقي بتعذب بنار الخوف ..عشان مش هقدر اوصللك ..
ومين اصلا هيستبعد ..دا مهما حاولتي يا سمسم ..
منيش هبعد ..

ولو كانت نيران قربك هتكوي القلب ع الحامي ..
انا ليكي هنا الحامي ..
وهفضل حتي لو كنتي نيران ف الجوف ..سنين العمروا لو عدّوا …ما يتعدوا ..
وهرجع ف النهايه غريب ..وهبكي لوحدي من غير صوت ..
فلو منك هييجي الموت ..انا قدُه ..وقد الخوف مابين قلبك وبين قلبي ..
وقد المستحيل حتي ولو ميجيش ..فمتقوليليش ..مهوش ذنبك ..
أكيد ذنبي ..
بحق الضحكه ف عيونك بلاش تبكي ..
بلاش للدمعه تدبحني ..انا لو ضهري كان محني ..متقتلينيش ..
ومتحاوليش ..
هموت جمبك ؟! ..وإيه يعني ..دا لو قربك هيوجعني ..
انا ف البعد مش هقدر حبيبتي أعيش ..
فمتحاوليش ..
مكتوب عليك الوجع .. يابو قلب مش خالي
ومنين هجيب الشبع .. والمال موهوش مالي ..
مكتوب عليك الفُراق .. والفرح مش مكتوب ..
العشق دا لو داق ..العشق كان هيتوب ..
منيش عارف اقوللك ايه ؟1
مادام مرتاحه ف غيابي ..
هقرّب ليه ؟!
مدام مش حاسّه بعتابي ..
هعاتبك ليه ؟!
موحشتكيش ؟! _موحشتنيش ..
طيب خلاص ..مالك بقا ؟!
_عاي ومفيش .. كان دا الكلام وقت اللقا ..
برد البعاد ..زاد ف العناد ..خلي العتاب ميهزنيش ..
عارف تعيش ؟!
عارف أوي ..ايه اللي يمنع إني اعيش ..
أصل المطر هو المطر ..واصل الشجر هو الشجر ..
والقلب صامد ما إنفطر …والخوف رحل من كام سنه ..
والدار أمان ومفيش خطر ..وانت هنا ..
وانا زي ما أنا ..
لو هبكي حبّه علي اللي راح ..هخسر براح ..
أصل الجراح مبتنتهيش …
وقاللك إيه …
ساعات الضحكه بتفاصل مع الافيه …
وبتنازع مع اللمعه اللي ف عيونك ..
وبتعافر عشان تخرج وما تخونك ..
وبتلومك علي الاحساس ..
علي المرسوم قصاد الناس ..
مادام الفرحه كدابه ..بتضحك ليه ؟!
صاحي النهارده وشوقي ليه زايد أوي …إن كنت مرّه غلطت يعني وقولتلك
ياسمسمه أنا مش ضعيف ..واني اقدر ابعد يعني عادي مهمنيش .
والبُعد عنّك زي قُربك كان مفيش ..
متصدقيش ..
في البعد عنّك عمري مرّه ما أكون قوي ..انا ف الحقيقه المؤلمه .كداب أوي ..
صوت الندا .. بينادي (حيّ علي الالم )..
قُم يا قُليب العاشقين لبّي الندا ..
مُنذ الايمان بالمُنتهي صابه العدم ..
كل الاحبّه إتبدّلوا ..
كل اللي قرّب م الصنم ..صبحم عدا …
اللعنه مش بس ف قرارك للفُراق ..
اللعنه فيك أبعد وأبعد من كدا ..
بين الايمان والكُفر بيك كان إتفاق ..
الكل خان عهد الشهاده وألحدوا ..
ياهل تري ..مين اللي هيكونلك فدا؟!
قلبك خراب …
كام ألف قلب جنح إليه وإستعبدوا؟!
علشان كده ..طال العذاب ..
بين إنتظار الممكن إنه يلحقك ..
أو الانتحار ع المقصله يوم الحساب ..
عزف الكمانجا بيقتلك وبيسبقك ..
قدّم قرابين الهوي لاجل المراد ..
قدّم قرابين الفرآق لاجل اللي غاب ..
الحكمه باينه ف قلب روح المستحيل ..
بتقولها لليل (إنتظر ..خليك طويل )
فاضل كتير ..
لسّاني بحسب حسبتي ..
كل اللي فاتوا دول يادوب رُبع اللي ساب ..

ومكانش ينفع لما روحت بدون عتاب ..
ترجع ف كل قرار عشان موجوع أوي..
لما انت اصلا حاجه أضعف م الغياب …
ليه كنت بتمثّل زمان إنّك قوي ؟!
ليه كل ما بتبعد تحسّ إنّك ضعيف ؟!
بس انت برضوا ف قُربهم أضعف كتير …
ضيّعت منّك كام حبيب ..بين شوق وغُربه وحبّ زيف؟!
مكتوب عليك قبل الاوان إنّك تشيخ ..
إتقل يا شيخ ..
وبُصّ حبّه علي اللي فات ..
كل اللي كان عاشق ومات ..
قلبه الصغيّر زي قلبك كان خفيف ..
?#‏مكانش_ينفع????
ومكانش ينفع لما قالتلك خلاص ..
أنك تداري علي الحقيقه المرعبه ..
ان كان بعاد القلب عنها هو الخلاص ..
مهما الجراح هتكون غويطه ومتعبه ..
فمكانش ينفع أن قلبك يخدعك ..
يضحك عليك ولسجن قلبه يرجعك ..
ويهدّ فيك …
قطر السنين لو فات عليك ..
وقت الندم ولا الف دمعه هتنفعك ..
وجعك قريب ..يوجعك اوقات اقل من البعيد ..
عجّل بقا بوقت الفراق ..
لو كان لابد تموت هنا ..
امشي بكرامه وموت أقل من الوحيد ..
?#‏مكانش_ينفع????
ومكانش ينفع يوم ما قولتلهم سلام ..
ارجع وأعاتبهم علي اللي كان سبب.. ف البُعد بيننا …
هيفيد بأيه وقت الوجع كُتر الكلام ؟!
فملوش لزوم ..ومن ألاصول ندفن بقا الحُب اللي مات ..
رغم احترام كل اللي فات ..
رغم الوجع والزكريات …رغم اللي هنشوفه ف بعادنا من حنينا ..
آن الاوان أنك تفارق من سكات ..
?#‏مكانش_ينفع????

وبسألهم ..
ساعات الذكري مبتوجعش ..برغم البُعد والقسوة …
برغم القول بان أنتم …مجرد ذكريات جارحه ولا تسوا ..
فليه دلوقتي بتبسّم عشان علي بالي جت سيرتك ؟!
وليه فاكر تفاصيلك
..جنون روحك
..نغم صوتك
..وضحكك ويا تكشيرتك؟!
وليه قابل كده بيكي ..برغم أن أنتي مش قابله ..؟!
وليه مُجبر أكون عنتر …مع أنك ولا تسوي …قُلامه ظُفر من عبله ..؟!
ومش عارف انا مالي …
وليه باقي علي حالي ..برغم الدنيا قلابه ..
وكل دقيقه تبقي بحال ؟!
ومليون ألف كلمه (ليه )…..وكام مليون سؤال وسؤال …
يا اول كلمه بعشقها ..عشان طلعت بدون ما أدري ..
يانقطه سواد ف طيف صورة …
يا دمعه ف عيني محشورة ..يا قصّه بتنتهي بدري ..
يا ألف مدينه من سُكّر …يا أبعد م الخيال بخيال ..
مُحال تنسي اللي كان بيننا …
مُحال تقسي علي سنيننا ..
محال ترميني جواكي أموت ف النار ..
محال تسقي القليب منّك صديد ومرار ..
محال تتنازلي عن عشقي ..محال جدا وألف محال ..

زمان يمكن بصوت قلبك… مكانش يصح إنّي أفوز ..
وميصحش أكون جمبك ..عشان غيري سبقني وفاز ..
ماهي الدنيا بتدينا حاجات يمكن بنزهدها ..
وتمنعها ف وقت الجد لما نعوز ..
وانا رافض أكون ليكي يادوب لعبه ..سراب كدّاب ..
كما المحروم من الضحكه…عشان عايش بوش شباب
وقلب من اللي شافه عجوز ..
يجوز …يمكن ..يجوز ينفع ..يجوز ينزل ..يجوز يطلع ..
يجوز أول ..يجوز تاني ..يجوز طاهر ..يجوز زاني …يجوز القلب بيعاني ..
يجوز خاين ..يجوز باين ..يجوز عاشر وألف يجوز ..
مفيش فيكي إحتمال ثابت ..
مفيش مليان صبح فاضي..
أيديكي من زمان سابت ..
وصوتك لسّه مش راضي …
انا المُجرم ف محكمتك ..وانا القاضي ..
يا سين ف الكسر فوق قلبي ..يا محور حُزن كان صادي ..
يا ساقيه الكُلّ من دمّي ..وسايباني الوحيد صادي ..
يا تعداد الحنين فيّا ..وتقويمي وأرصادي ..
كواني البرد من بعدك علي الوتر اللي كان حساس ..
دموعي خايفه تفضحني قُصاد الناس ..
وانا الكداب ف أقوالي …ولو يسالني عن حالي ..
بقولله نسيت ..وباين كدبي ف عيوني ..
بحبك موت ..وموت جدا ..
بحبك وقت ما تردي ..واحبك لما بتصدي ..
وأحبك وقت بتوفي ..واحبّك لما بتخوني ..
واحبك وقت ما الاحلام علي قلبي بتتجمّع ..
أدان العشق قام يدّن ..
وصوت الحقّ لو يضعف ..اكيد للقلب هيسمّع ..
انا العابر ف أمواجك بحور ناشفه ..
وانا الصورة اللي مش واضحه ومش كاشفه ..
وانا اللي بقالي كام فُرقه بناديلك .. ..
وانا اللعنه اللي ساكناكي ..منين ماتروحي هتجيلك ..
أنا صوتك ..وانا جيلك ..
وانا النصّ اللي كان مُبهم ..وزاد إبهامه تاويلك ..
أنا شمسك ..وانا نيلك..
انا موضوع ملوش اسباب …وخايب ساب حنينه وغاب ..
أنا الزاهد وعاش كداب …وانا العاصي اللي عمرة ماتاب ..
وانا المجنون ..وانا المسجون ..وانا اللي اتخان وناسي يخون ..
وانا الباقي اللي عمرة ما ساب ..
وانا السرّ اللي مش نافع …يفكّ غموضه تعليلك ..

خلاص راحت ..
بلاش تندم علي الماضي …بلاش تتعب علي الفاضي ..
بلاش تشرب عشان تنسي …بلاش أصلا ..بلاش تقسي ..
بلاش تتمادي ف الاشواق ..بلاش تعشق بقلب نضيف ..
بلاش تكذب ..
بلاش تكتب ..
عشان الكلمه دلوقتي .. بتقلب ف الوجع بخريف ..
لو المرادي شيء يجرا ..
محدش تاني راح يقرا …
فشيل اوراقك الخضرة ….وبدّل بالكلام تخاريف ..
ساعات البُعد بينسّي ..ساعات الجرح بيقسّي ..
ساعات الدنيا بتموت ..مُحرك قلبنا الحثّي ..
لكن حاسب عشان دايما ..سيول الدمع لو تنزل ..
بتقلب ف الفُراق بنزيف ..واما بكون فرحان بتمنّي ..

ان ان الفرحه ياريت تستني ..
علشان (سمسم) تبقي معايا ..
تاخد فرحتي وتكبرها ..
لما بكون فرحان يا حبيبتي ..
غصبن عنّي بستخسرها …
اصل الفرحه ساعات بتغيّب ..
مرّه تصيبني وألف تخيّب ..
وانا من ضعفي ..بستنظرها ..
لما بكون فرحان ياحبيبتي ..
غصبن عني بحوّش ضحكي ..
لما أكون ويّاكي فتحكي ..
أيوه ساعتها انا هضحك جدا..
أما الضحكه ف بعدك تدّن ..
هكتم فيها وأخبّي عنيا ..
أصلك وانتي بعيده عليا ..
حتي الضحكه بستكترها ..
لما هكون فرحان ياحبيبتي ..
هكتم فرحتي وهوفرها ..

شعاع الشمس بيصبّح علي النايمين ..
وع القايمين ..وع المجاريح ..
وع الناسيين ..
وع السايبين ..
وجايب كام أمل ويّاه ..وجايب شوق بقدّ الريح ..
وجايب م القمر تفاريح …
وجايب بوسه من خدّ الحوريه هناك ..
وجايب ورده منها معاه …وجايب بوسه م البنت اللي بتحبّك ..
وبتقوللك ..بقالها سنين بتستناك ..
تعالي نطفّي نار البّعد ف الاحضان ..
هتعشقني ..هكون ملكك …هتسرقني ..هكون ملكك ..
بلاش تنظر إلي النجمه لا قلبي يغير ..
صباح النور علي عيونك ..
صباح الخير
بتبيع للناس..وهم الاحساس ..
وبترجع آخر الرحله وحيد ..
الضحكه مشاع ..والفرحه متاع ..
مفاضلش ف وطنك غير تجاعيد ..
كام واحد حبّك مرّه وباع ؟!
كام واحد سيبته بأيدك ضاع ؟!
كام مرّه بكيت؟! ..كام مرة حكيت ؟!
كام مرّه قاسيت يابو قلب حديد؟!
كام مرّه بقيت ..ف البرد لحاف ؟
كام مرة أكلت ف قلبك حاف ؟
الخوف بيخاف ..
بس أنت تكون قدّ التهديد ..
ومادام خلاص …فملوش لزوم وقت العتاب …
هيفيد بأيه كُتر النواح علي قلب مات ؟!
لملم دموعك من تراب صابه العفن ..
واكتم أنينك ..
وشيل سنينك ..
وروح وفارق من سكات …
ومتنتظرش المعجزات ..المعجزات خانها الزمن ..
وان كنت فاكر أن وطنك كان هنا ..
خدعك هواك ..الارض دي ناكره الوطن ..
راح الوطن ..مفاضلش غير الذكريات ..
انا همشي بس اعمل حسابك أن أنا..
هفضل بعيد يجي كام سنه ..
وهطول النوبه الغياب ..
وما دام خلاص ..فملوش لزوم وقت العتاب ..
خلاص هبعد ..وهتعوّد ..
بأنّي حقيقي مش طيب ..لابد اقسي …
ولو ع الجرح ..سنين البُعد بتطيّب ..
يومين وأنسي ..
يومين والدمع دا هيجفّ..
يومين والشوق أليك هيخفّ..
يومين الحُزن يتحول ..
يومين وارجع كما الاول ..
ضعيف يمكن .لكن طيب ..

صباح الشوق ..
علي المحروق …بنار الفُرقه من بدري ..
صباح محقوق ..
لطيف مخنوق ..أتاه العشق من حيث ..
ماكان يعلم ولا يدري ..
صباح مشنوق ..
ياريتنا نفوق …صباح العشق مش دافي ..
دا أبرد م الجليد بكتيير ..
عيون العاشق الغافي ..
بتحلم لو ف مرّه تطير
تعاتب كل ذرة ريح ..
صباح الخير علي المجاريح ..
بتتمشي ف آخراليوم …
ساعات ف الشارع البحري ..
ساعات ف الشارع القبلي ..
ساعات تتمشي فوق قلبي ..
وتاخد قلبي وتسيبلي ..
حنين بالكوم ..
وشوق بيزاحم النشوة ..
وجات الوحده بالعافيه ..
سماء العشق مش صافيه ..
ماليها غيوم ..
يا نجمه ف السما هدّي ..
سنين العمر بتعدّي ..
وانا واقف محلّك سر ..
ما تيجي ابوح اليك بالسرّ
كفايا نجوم ..
هشيلك ف الخيال نجمه ..
واجيبك م السما بيدّي ..
واشيلك ف القليب كلمه ..
وهحلم حلم علي قدي ..
معاكي لآخر المشوار ..
منين ما تجيبي وتودي ..
ولو كان الفراق من نار ..
هيجي لعندي ويهدي ..
منيش رايداك تكون مارد ..
ولا ريداك تكون سلطان ..
انا رايداك تكون حدّي ..
>>يا كل من خاف الفُراق يوم اللقا محصلش ليه ؟؟!
لما القليب سلّم اووي للمهلكات المنجيات ..
دوقتوا المرار من الف عام …
دوقتوا الفرح من قد ايه ؟!
مكتوب علي جبين الصبي ..ان اللي فارق مرّه مات …
يا صوت صداها المعجزة جوّه الكيان …
بشويش ياريت علشان أنا من كام سنه وانا نفسي انام …
يا ضيّ عين (سمسم) بلاش غيبتك تزيد …
سايق عليك صوت الكمان …ان كنت تايه ف المكان ..
فأنا من مش بعيد ..
انا من زمان ..وانا نفسي اشوفك حتّي مرّه ف المنام ..
وكل ما اقول تقول (لا)
كأن عنادها سحر حلال ..
تزق القلب 100 زقه ..
مفيش غيرها بتسكن فيه …
ولا غيرها يمر ببال ..
دي لو تضحك قصاد قلبي ..
بيتلغبط …
يلاقي الوقت يستعبط ..
يزيد يومه ..تطول لياليه ..
وضحكتها كما الموال ..
يلاغي القلب من جوّة ..
فبيسلّم ويفتح باب ..
فتدخل قلبي بالقوة ..
كأنه ما حب يوم واتساب ..
ولا ف مرة كوانا عذاب ..
بيستسلم كأنه سراب ..
وغصبن عنه حب وداب ..
أمانه يا حلوة تفتكري ..
بأني بخاف ..
عزيز قلبي جفاه الحلم ..
وعاش قلبي سنينه عجاف ..
انا طبعي في غايه الحلم ..
ولو حتي هحبك حاف ..
انا راضي ..
ف وقت البرد ضميني ..
رموشك تبقي ليا لحاف ..
هحبك حب مش عادي ..
وهكتبلك حروف اسمك ..
علي صفحه جدار قلبي ..
بقلمي الجاف ..هي عارفه ..بس خايفه ..

لو تبان مش واخده بالها ..
بس من احساسها شايفه ..
أنه عاشق طيف خيالها …
والحكايه قديمه جدا ..
انتهت قبل البدايه ..
الحكايه مش حكايه ..
هي عاشقه لحد غيرة ..
هو كتّر الف خيرة ..
راح يصارح قلب قاسي ..
والاجابه المرة ..آسفه ..
وانزلوا بتتر النهايه ..
هي عارفه ..

لو هتضحك ألف ضحكه …
برضوا عينك لسّه فيها ..
ألف دمعه متدّاريه …
لو هتمشي ف الف سكه..
ولاّ هتمثّل عليها ..
برضوا واضح أن شعرك ..ليها هي ..

منذ الازل …
قالوا زمان ف العشق كام مليون غزل..
وان الاجل ..
وقت أقتراب العشق بيخاف م الأجل ..
وأن القليب لو حرّ كان سجنه الهوي …
وان اللي مات بالعشق مات منه الدوا ..
وان التسرّع ف الفراق …
مش بأتفاق ..
وان الكلام ف العشق صار شيء مبتذل ..
وان المحبّه براح كبير مش مختزل ..
وان البشر ف الاصل صورة من الخيال ..
وان اللي عاشق شيء هيوصل للمحال ..
وان الوجع بالفرقه فوق الاحتمال ..
وعشان كده ..أحنا اتخلقنا من العجل ..
وانا قولت ايه؟…يا (سمسمه )
يام الضفاير صوت وصورة من الامل …
السجن فيكي هو عين التهلكه …
وانا لما كنت زمان بعافر ف الخيال ..
كان كلي شوق أني املكه ..
نادي منادي للصلاة ..لاجل افتدي قلبي اللي سيبته جوّه منّك لما تاه ….
ف السجده لمّا جبهتي كات قرّبت …
واستسلمت طوعا لنورعرش الاله …
والقلب فاض حزنه وأذن..أطلق سراح شوق دمعتي …
وبدال ما هدعي اني الاقي برّه منّك طوق نجاه …
كات دعوتي ..
يارب أفضل فيكي تايه ألف عام …
الدعوة دي كات مُهلكه ..
وانا بدعي طالع من قليبي دمع خام ..
يانور عنيها المعجزة …انا قولت ياه …
سبحان جلال من صوّرك ترياق حياه …

بقلم // عبده