تنظيم وتشكيل السفرة اثناء العزومات

تنظيم وتشكيل السفرة اثناء العزومات
admin hala اقسام الاسرة
ويكي حياتي :

عروسه لسه جديده و اهل جوزك عازمين نفسهم عندك  عايزين يشوفو عزوماتك عامله ايه ويطمنو على ابنهم اوعندك عزومة  او حفلة قريب و مش عارفه تعملى ايه ؟؟!! مش عارفة ايه التجهيزات و الترتيبات اللى هتحتاجيها ؟؟! مش عارفه هتعملى اكل ايه ؟؟!!  و هتقدميه ازاى ؟؟! و هتبدأى  بايه ؟؟! كل دى حاجات ممكن تشغل بالك و تخليك محتاسه و مش عارفه تعملى ايه او تبداى منين

علشان كدا هنديكى شويه نصايح عشان تساعدك فى عمل الاعدادات و الترتيبات اللازمة للعزومة

من اول امتى ابدأ اخطط لعزومة و ايه اللى احضره علشان العزومه و هرتب السفرة بتاعتى  ازاى  و ايه اللى هتعمليه يوم العزومة

كل اللى عليكى انك تقومى بالنصايح دى

  • اهم حاجه فى موضوع العزومات دا  ان يكون فى مهله كافيه  قبل العزومة علشان تفكرى هتعملى ايه و تجهزى كل اللى هتحتاجية
  • تكون عارفه عدد الاشخاص اللى جاية علشان تعمل اكل يكفى الكل و متضطريش انك تعملى اكل بزيادة اووى و يترمى فى الاخر
  • تبتدى تفكرى ايه انواع الاطعمة اللى هتعمليها و تشوفى ايه الوقت المناسب للبدء فى كل صنف يعنى فيه اصناف ممكن تبدأى فيها قبل العزومة بيومين او تلاته زى لو انك هتعملى تتبيلة معينه للفراخ او اللحوم او ممكن تجهزى الاصناف اللى من  الممكن حفظها فى الفريز كان تقومى مثلا لو انك سوف تعدين كفته  كل ما عليكى هوا اعداد عجينة او خليط الكفته  و عملها صوابع و تخزينها فى الفريز حتى تكون جاهزة للاستخدام فى يوم العزومة
  • حاولى ترتبى البيت بتاعك قبل العزومة علطول بيوم او حاجه على حسب احتياجات البيت  على ان تتركى يوم العزومة  لاعداد الوجبات و الاصناف المختلفة و تجهيز و ترتيب السفرة
  •  حاولى تجهزى الاطباق و الاوانى و الشوك و السكاكين و المعالق اللى هتستخدمية فى العزومة قبلها بيوم

طب كدا انتى خلاص جهزتى و حضرتى الحاجات اللى هتحتاجيها بناء على الاصناف اللى هتعمليها نجى بقى ليوم العزومة المنتظر كل المفروض انك هتعمليه فى اليوم دا هو انك تجهزى الاكل بتاع العزومة و تسويه و كمان انك تجهزى السفرة  و الاهم من انك عملتى اصناف ايه فى العزومة هو طريقة تقديمك و ترتيبك للاصناف و لان السفرة لازم تكون منظمة و مرتبه على اكمل وجه عشان ميضعش اللى انتى عملتيه فى الارض نتيجة سوء ترتيب و تنظيم السفرة   و لان ترتيب  و تنظيم  السفر  بيعكس اهتمامك باللى انتى عزماهم علشان كدا هنبتدى نديك شوية نصايح عن اتيكيت و طريقة ترتيب و تنظيم الاكل على  السفرة او المائده  و من الحاجات اللى بتوفر الوقت فى يوم العزومة هو انك ممكن تستغلى الوقت اللى الاكل بيستوى فيه و تقومى بترتيب و اعداد السفرة يعنى لحد ما يكون الاكل استوى تكونى  انتى رتبتى السفرة

طرق ترتيب السفرة

  • الخطوة الاولى من ترتيب السفره ممكن تعمليها اثناء ما يكون الاكل بيستوى  و هى انك تجيبى مفرش  شيك كدا و تفرشيه على السفرة

  • بعد كدا بتجيبى مناديل السفرة  و تحطيها باى شكل انتى عايزاه و الخطوة دى ممكن تعمليها اثناء ما الاكل بيستوى برضه  بس حاولى تكون المناديل اللى هتحطيها تكون مناسبه مع لون المفرش  وممكن تعمليها باشكال حلوه وجميله بحيث تجذب الانتباة وتخلى شكل السفرة حلو  زى الصور اللى هنعرضهالك بتوريكى ازاى ممكن تعملى مناديل السفرة باشكال مختلفه مع الخطوات

  • تالت خطوة ممكن تعمليها و هى خطوة اختيارية  بس بتخلى للسفرة شكل جميل هى انك تجيبى فازة فيه ورد اى ورد موجود عندك سواء ورد طبيعى او ورد بلاستيك  و ترتبي الورد فيها بشكل حلو كدا و تحطى الفازة دى فى وسط السفرة  بس اهم حاجه لازم تاخدى بالك منها ان الفازة متكونش عاليه اوووى  و ان يكون علوها متوسط

  • بعد كدا هتيجى تقولى ياه ايه دا كله فين بقى الحاجات التانية اللى هى هرتب الاطباق و الشوك و السكاكين و المعالق ازاى ؟؟! و هرتب الاصناف ازاى ؟؟!! اول حاجة تكون عاملة حساب كل فرد من المعزومين فى طبق فاضى والطبق دا هو يغرف فيه من الصنف اللى هو عايزه  وتكونى حاطة السكينة على يمين الطبق و تحطي جنبها المعالق  و تحطى على شمال الطبق الفاضى بتاع كل فد الشوكة الخاصه به 
  • كمان هتحتاجى انك تحطى كوباية ماية لكل فرد يعنى هتيجى جنب كل طبق فاضى وتحطى كوباية ماية  و تكون الكوباية على يمين الطبق بالاضافة ال دورق كبير يكون فيه مايه وتحطيه فى منتصف السفرة
  • و من الحاجات الصغيرة اللى ممكن تنسيها فى العزومة هو انك تحطى الملاحات (الملاحات دى اللى بتحطى فيها التواب و البهارات بتاعتك ) ممكن تحطى لكل واحد ملاحه خاصة به او لو عدد الملاحات عندك مش كفايه ممكن تحطيهم فى منتصف السفرة بيحث يكونو فى متناول الجميع

 

  • ملاحظة مهمه لازم تاخدى بالك منها انك متمليش كوبايات المايه الا قبل ما الضيوف ييجوا بفتره صغيرة
  •  يجب عليكى وضع الطبق الرئيسى فى المنتصف او اذا كان عدد المعزومين لديك كبير  فعليكى تقسم الطبق الرئيسى على  عدد من الاطباق بحيث يكون فى متناول الجميع
  • يجب عليكى التنسيق بين الاطباق  و وضعها على مسافات مناسبه على السفرة من المدعوين بحيث يستطيع المدعو تناول اى صنف بسهولة و الا يكون  طبق صنف معين بعيد عن متناول يده
  • لو هتقدمى قهوة او شاى او اى مشروب يفضل انك تحطيه على يمين كل فرد حتى يسهل تناوله متى اراد  ويمكنك  وضع معلقة القهوة او الشاى على طبق الفنجان  او على الناحية اليمنى من الفنجان

كل دى نصايح هتساعدك عشان ترتبى السفرة بتاعتك  بس دا كله احنا مقولناش ازاى نستخدم الادوات الموجوده على السفرة

ازاى استخدم مناديل السفرة دى شويه نصايح لازم تاخدى بالك منها لما تيجى تستخدمى مناديل السفرة

  • انك متحطيش مناديل المائدة على ياقة القميص
  • او انك متحطيش مناديل المائدة على الصدر
  • او انك متحطيش مناديل المائدة على تحت الرقبة
  • او انك تحطيها بين ازرار القميص

كل اللى عليكى و انتى بتستخدمى مناديل السفرة  انك تستخدميها  بعد لما تخلصى الاكل نهائى او انك ممكن تستخدميها لو فيه بقايا اكل على شفايفك  ومتنسيش لو حبيتى تقومى لاى سبب من اسباب كانك خلصتى اكل  او عايزة تدخلى التويلت  انك تحطى منديل السفرة تانى على السفرة قبل ما تقومى احسن يقع على الارض ويكون الشكل مش لطيف

بعد  انتهاء العزومه ومغادرة المعزومين ربما تجدين كميات كبيرة من الطعام المتبقى  فكل ما عليكى فى هذه الحالة هو الاحتفاظ بالطعام المتبقى فى الفريزر او التلاجة و تقدميها طول الاسبوع لكى و لعائلتك   كما يمكنك تجديد نوع الصنف واعداده باضافا مكونات اخرى فيصبح طبق جديد  ودا هيخليكى مستريحه  من مشكله اعداد الاكل لفتره  لحد ما الكميات المتبقية دى تخلص  وتتخلصى من الاحساس بالذنب لو رميتى الاكل المتبقى

الكلمات المفتاحية : #اتيكيت #ترتيب السفرة #عزومة